Así, metémonos na Foix Grande. La Foix ye un gran desfiladeru calcáreu entre Peña Rueda y Peña Arpín y que ye el único accesu asequible por estos lares de los Puertos d'Agüeria. El camín ye fácil de seguir, primero por la derecha y luego, pasando el ríu a la izquierda... pero de pronto, el camín desaparez. Nun sé si esti inviernu o el pasáu, debió haber una riá de campeonato que arrasó la Foix, porque de camín nada, na más que un montón de regodones ye lo que topamos. Hay que arreglase la vida pa calar arriba como se pueda.


Tras pasar la Foix Grande, el terreno ábrese y salimos a los Puertos d'Agüeria. Los Puertos, son una inmensa superficie de vegues, biesques de carrascos y texos, salpicá de charques, llagos y regueros serpenteantes. Un remansu de paz, que nun tien equiparación en toda la Cordillera. Únicos.

Tan flanqueáos de peñes calices de más de 2100 metros por todes les partes (los Güertos del Diablu, Ranchón, Pachón, Cigacha, Fariñentu, Siegalavá, Tapinón, Peña Rueda,...) y el únicu desagüe que tienen son la Foix Grande y la Pequeña, que al uníse formen el ríu Lindes.




Atravesamos los Puertos (cruzando ca ún de los regueros xeláos que los surquen) hasta calar a lo más fondero, la vega de Retuertu, baxo Peña Cigacha. Aquí xintamos algo, eso sí, a una temperatura de lujo... nunca superamos los 0ºC al sol!!!!. Tengo que decir que en un sitiu como esti, llenu de vida, nun vimos ni una miserable torda... nun sé si por el frío o por quién sabe qué.



Xintamos como limes y, como ya ye tarde, decidímos tirar p'arriba  col obxetivu de seguir hasta onde lleguemos. Algunos quieren esguilar el Práu, pero ye obvio que nun vamos calar ni de broma... Seguimos hasta la Vega Chonga, onde desemboquen los dos canalones que baxen del Joyu Chongu y del Colines, el Canalón Bajeru y el Cimeru, ambos separáos por Peña Reonda.


Son les dos de la tarde y metémonos de lleno nel Canalón Cimeru, últimu momentu del día nel que vamos a sentir los rayos del sol nel focicu. La cara tenémosla como cuero.



Pasáu el pedreru, garrámos altura hasta llegar al neveru que sigue la llínea del Canalón. Aquí calzamos los crampones y el piolo y p'arriba. La ñeve ta espectacular pa cramponear y garrámos altura rápidamente por el Canalón Cimeru, con les vistes de Peña Cigacha, Peña Rueda y los Puertos de Agüeria na retina.





Subimos como tiros porque tá tan frío que nun se puede parar. Pasamos la cimera de Peña Reonda y la gran sima previa al Joyu Chongu hasta calar por fin a eso de les tres de la tarde nel Joyu Chongu. Ún llugar alpinu, salvaje y olvidáu (facía más de diez años que nun pisaba por esti Joyu).




Ye muy tarde, la cumbre del Práu ta a unes dos hores más o menos y la temperatura ronda lo -8ºC. Nun se puede facer más por hoy, toca baxar... pero la crestería de les Torres llámanos demasiáo.


En un útimu esfuerzu, esguilamos hasta la brecha que separa la primera y segunda de les agujes de les Torres, rondando la cota de los 2050 metros más o menos. La brecha, ún sitiu espectacular, alpinu.

De esta parte ya nun tengo fotos, ya que se me descargó la batería de la cámara nel Joyu Chongu. Probablemente debío a les gélides temperatures que tamos sufriendo n'esti día.

Ahora tócanos desandar lo andáo. Por el mismu itinerariu baxámos. Hay que baxar ligeros que nun ye plan de cruzar el ríu de Lindes de nuechi, porque fijo que petámos.

Así, sin más novedá que les temperatures que baxen cada hora más, calamos a Lindes a les 18:30 hores, tras más de ocho hores y media de andar, veintimuchos kilómetros, más de 2600 metros de desnivel acumulau, el fríu metíu en los huesos y, yo, con un par de botes menos... PINCHA AQUÍ PA VER EL TRACK DE LA RUTA (GPS de Fabián)

Paramos nel pueblo quirosanu de Cortes pa tomar algo y quedar absortos delante de la chimenea del chigre. Al marchar parez que quier nevar en seco, caen copos. Hay que volver pa casa ya...

Un día superprestosu, con un itinerariu muy variáu y una compañía excepcional. Nos vemos en la siguiente compañeros.